بچوں کے لئے ماں کے دودھ کے فوائد

کی فہرست بہت طویل ہے لیکن آئرلینڈ کے سائنسدانوں نے ایک حا لیہ تحقیق کے بعد ایک اہم  فائدے کو اس فہرست سے نکال دیا ہے۔ بچپن میں ماں کا دودھ پینے والے بچوں کی ذہانت اس دودھ سے محروم رہنے والے بچوں سے بہتر نہیں ہوتی ۔ تحقیق کار لیزا کرٹین جرارڈ نے بتایا کہ جو بچے ماں کے دودھ سے محروم رہتے ہیں ان میں بھی مسائل کو حل کرنے اور زبان سیکھنے کی صلاحیت ماں کا دودھ پینے والوں جیسی ہی ہوتی ہے۔ تحقیق کے دوران یہ بھی معلوم ہوا کہ ماں کے دودھ سے محروم رہنے والے بچے تین سال کی عمر میں نسبتاً زیادہ بے چینی کے شکار ہوتے ہیں تاہم پانچ سال کی عمر تک یہ فرق بھی تقریبا ختم ہو جاتا ہے۔ اگر چہ ذہانت کے معاملے میں کوئی فرق نہیں دیکھا گیا، تاہم تحقیق کاروں کا کہنا ہے کہ ماں کا دودھ پینے والے بچے عمومی صحت، قوت مدفعت اور کئی اقسام کی بیماریوں کے مقابلے کی صلاحیت میں مصنوعی دودھ پینے والے بچوں سے کہیں بہتر ہوتے ہیں۔